Эрүүл мэндийн яамнаа өнөөдөр эх барих эмэгтэйчүүдийн зөвлөх эмч, ерөнхий мэргэжилтнүүдэд зориулсан “Жирэмсэн болон төрсний дараах үед үзүүлэх тусламж, үйлчилгээний журам” танилцуулах уулзалт семинар болж байна. Уулзалтад Эрүүл мэндийн сайд Н.Удвал, ДЭМБ-ын Монгол дахь суурин төлөөлөгч Су Нюнт У болон ЭМЯ-ны холбогдох албаны хүмүүс, 21 аймаг, 9 дүүргийн эх барих эмэгтэйчүүдийн эмч, ерөнхий мэргэжилтнүүд оролцож байна.
Эрүүл мэндийн сайд Н.Удвал уулзалтад оролцож үг хэллээ. Тэрээр “Эх, нярайг эсэн мэнд амаржуулах, хариуцлагатай ажилд мэдлэг, ур чадвар, хичээл зүтгэлээ дайчлан эх орныхоо өнцөг булан бүрт ажиллаж байгаа эх барихын ерөнхий мэргэжилтэн, зөвлөх эмч, тусламж үйлчилгээг зохион байгуулагч та бүхэнтэй уулзаж байгаадаа баяртай байна. Та бүхний энд цуглах болсон нэг зорилго нь эмч, эмнэлгийн ажилтан нэг бүрийн мэддэг жирэмсэн эмэгтэйд үзүүлэх тусламж, үйлчилгээ сайжирч, эхийн хүндрэл эндэгдлийг бууруулахад үр дүнгээ өгсөн 39 дүгээр тушаалыг ДЭМБ-ын удирдамжийн дагуу шинэчлэн боловсрууллаа. Шинэчилсэн “Жирэмсэн болон төрсний дараах үед үзүүлэх тусламж, үйлчилгээний журам“-ыг 338 дугаар тушаалаар баталсныг танилцуулж, хэрхэн мөрдөх, хэрэгжүүлж ажиллах талаар зааварчилгаа өгөх явдал юм. Та бүхэнд амжилт хүсье” гэлээ.
Эрүүл мэндийн яамнаас 2014 оныг “Эх, хүүхдийн эрүүл мэндийг дэмжих жил” болгон зарласан. Энэ ажлын хүрээнд “Эх, хүүхдийн эрүүл мэнд” цахим шуурхай зөвлөгөөнийг 7 хоног бүрийн баасан гарагт хийж, төрөлт, эх, хүүхдийн өвчлөл, эндэгдлийн мэдээлэл, эх, хүүхдийн эрүүл мэндийг сайжруулах чиглэлээр ЭМЯ-наас болон орон нутгаас хийж хэрэгжүүлж байгаа ажлын талаар танилцуулж, харилцан туршлага солилцох үр дүнтэй ажил болж байна.
Сүүлийн жилүүдэд 5 хүртэлх насны хүүхдийн эндэгдэл буурч байгаа ч нялхсын эндэгдлийн 60-65 хувийг нярайн эндэгдэл, нярайн эндэгдлийн 80 хувийг эрт нярайн эндэгдэл эзэлж байна.Эрт нярайн эндэгдлийг бууруулахад жирэмсний хяналт, төрөх өрөөнд үзүүлж байгаа тусламж их нөлөөтэй. Нярайн эрт үеийн нэн шаардлагатай тусламжийг цогцоор зөв үзүүлэх нь нярайг эндэхэд хүргэдэг түгээмэл шалтгаануудаас сэргийлэх өртөг багатай, үр дүн сайтай арга юм. Тухайлбал бидний өдөр тутам хийдэг нярайг төрмөгц шууд бүрэн хуурайшуулах, эхтэй нь арьс арьсаар шүргэлцүүлэх, хүйг зөв цагт зөв хавчин, нэг удаагийн үйлдлээр хайчлах, нярайг эхээс тусгаарлахгүйгээр хөхийг амлуулах зэрэг үйлдлийг тогтмол, зөв хийж хэвшүүлэхэд л нярайн эндэгдлээс сэргийлэх боломжтой байна. Энэ үйл ажиллагааг хэрэгжүүлэхэд эх баригч, бусад эмч, сувилагч нарыг манлайлан ажиллахыг салбарын сайд уриаллаа.
