Уул уурхайн салбарын хөгжил манай улсын эдийн засаг, нийгмийн хөгжилд жинтэй хувь нэмэр оруулж байгаа боловч хариуцлагагүй уул уурхайн үйл ажиллагаанаас үүдэлтэйгээр байгаль орчин, хүн амын эрүүл мэндэд сөрөг нөлөөлөл үзүүлж байна. Тухайлбал, Өмнөговь аймагт хүн амын өвчлөлийн тэргүүлэх шалтгаанд амьсгалын тогтолцооны өвчин бүртгэгдэж байгаа бөгөөд 2007 онд 10,000 хүн ам тутамд 1148.5 өвчлөл бүртгэгдэж байсан бол 2009 онд 2188,8 болж даруй хоёр дахин өссөн нь улсын дунджаас 3.5 дахин их байна.
Одоогийн мөрдөж байгаа хуулиар бүх төрлийн төсөл эхлүүлэхээс өмнө хүний эрүүл мэнд ба нийгэмд нөлөөлөх нөлөөллийг “Байгаль орчинд нөлөөлөх үнэлгээ”-ний хүрээнд байгаль орчны мэргэжлийн байгууллага хийж байгаа ч хүн амын эрүүл мэндэд хэрхэн нөлөөлөх асуудлыг мэргэжлийн бус байгууллагын тайланд дурьдах төдий байна.
Иймээс НЭМҮТ-өөс Канад Улсын Засгийн газар, Эрүүл мэндийн яам, Байгаль орчин, ногоон хөгжлийн яам, Уул уурхайн яамтай хамтран бодлого боловсруулагч нарт зориулсан “Байгаль орчны нөлөөллийн үнэлгээ: Эрүүл мэндийн нөлөөллийг үнэлэх” сэдэвт сургалтыг энэ сарын 4-6-ны өдрүүдэд зохион байгуулж байна. Уг сургалтыг ДЭМБ-ын олон улсын зөвлөх багийн хамт олон удирдан явуулж байгаа юм.
Энэхүү сургалтын зорилго нь уул уурхайн салбарт хийгдэж буй байгаль орчны нөлөөллийн үнэлгээнд хүний эрүүл мэндийн нөлөөллийн асуудлыг тусгах, байгаль орчны үнэлгээний тогтолцоо, үйл ажиллагаанд хүн амын эрүүл мэндийг авч үзэхэд засгийн газрын төрөл бүрийн байгууллагуудын гүйцэтгэх үүргийн талаарх ойлголтыг нэмэгдүүлэхэд чиглэгджээ.
Сургалтад ЭМЯ, НЭМҮТ, БОНХЯ, УУЯ-ны мэргэжилтнүүд, томоохон уул уурхайн үйл ажиллагаа идэвхитэй явагдаж буй 10 аймгийн Эрүүл мэндийн газрын Нийгмийн эрүүл мэндийн хэлтсийн дарга нар, Мэргэжлийн хяналтын газрын орчны эрүүл ахуй болон байгаль орчны үнэлгээ хариуцсан мэргэжилтнүүд зэрэг 65 орчим төлөөлөгч оролцож байна.
Сургалтаас хүлээгдэж буй үр дүн:
• Эрүүл мэндийн нөлөөллийн үнэлгээний сургалтын хөтөлбөр, материалтай болно.
• Уул уурхай, байгаль орчин, эрүүл мэндийн бодлого боловсруулагч, бодлогыг хэрэгжүүлэгч гол шийдвэр гаргагч нарын эрүүл мэндийн нөлөөллийн үнэлгээний талаарх мэдлэг, чадвар нэмэгдэнэ.
• Байгаль орчны нөлөөллийн үнэлгээнд хүний эрүүл мэндийн асуудлыг зайлшгүй тусгахын ач холбогдлыг ойлгоно.
