Төв Азийн бүс нутгийн Эдийн засгийн Хамтын ажиллагаа/ТАБНЭЗХА/-ны хөтөлбөрийн хүрээнд 2013 оны зургадугаар сарын 6-7-ны өдрүүдэд Туркмены нийслэл Ашхабад хотод болсон Эрчим хүчний 15 дугаар салбар хуралдаанд ЭХЯ-ны Төрийн захиргааны удирдлагын газрын дарга Л.Батсайхан, Бодлогын хэрэгжилтийг зохицуулах газрын ахлах мэргэжилтэн Х.Авирмэд нар оролцлоо. Салбар хуралдаанаар энэ бүс нутгийн Эрчим хүчний аюулгүй байдал, эрчим хүчний хүчин чадлыг нэмэгдүүлэх, эрчим хүчний экспорт импортын уялдаатай хамтын ажиллагааны талаар хэлэлцжээ.
Уг салбар хорооны эхлэл 2006 онд Бүс нутгийн Эрчим хүчний сайд нарын уулзалтаар тавигдаж, Киргиз, Тажикстан, Афганистан, Пакистан гэсэн дөрвөн орны төлөөлөлтэй байсан бол өнөөдөр өргөжин тэлж Азербайжан, БНХАУ, Монгол, Туркмен, Казакстан, Узбекстан болон Азийн хөгжлийн банк, Эрчим хүчний хартын нарийн бичгийн дарга нарын газар, Исламын хөгжлийн банк, Дэлхийн банк, ТАБНЭЗХА-ны нарийн бичгийн дарга нарын газар зэрэг улс орон, байгууллагуудыг нэгтгэсэн томоохон механизм болжээ. 2006-2012 он хүртэл Төв азийн орнууд болон Афганистан, Пакистаны хоорондын эрчим хүчний экспорт импорт нэмэгдсэн тоон үзүүлэлт байгаа юм.
Хуралдааны үеэр Төв Азийн бүс нутгийн орнуудын хамтын ажиллагааны 2010-2012 онуудын үйл ажиллагааны тайланг сонссон бөгөөд ирэх 2015 он хүртэлх Эрчим хүчний салбарт хэрэгжүүлэх ажлын төлөвлөгөөг хэлэлцсэн байна.
Төв Азийн бүс нутгийн Эдийн засгийн Хамтын ажиллагааныхүрээнд 2011 онд Эрчим хүч гаргах чадавхийг сайжруулах, Дамжуулах шугамуудын суурилуулалтыг сайжруулахаар ажилласан бол өнгөрсөн 2012 онд л гэхэд хүчин чадлыг найдвартай болгох, шинэ эх үүсвэр бий болгоход анхааран ажиллаж, 2015 он хүртэлх үйл ажиллагааны төлөвлөгөөнд тусгаад байна. Төв Азийн орнуудын хувьд дэд бүтцээ хөгжүүлэх, бүс нутгийн эрчим хүчний төлөвлөлтийг харилцан уялдаатай болгоход хамтран ажиллах шаардлагатай байгаа юм. Үүний тулд эрчим хүчний илүүдэлтэй Тажикстан, Киргизээс Пакистанаар дамжуулан Афганистан хүргэх цахилгаан дамжуулах агаарын шугам байгуулах, эрчим хүч худалдах, худалдан авах худалдааны сонирхол үүсгэх, хамтарсан эрчим хүчний байгууллага байгуулах зэрэгт анхаарах зайлшгүй шаардлага урган гарсан байна.
Монгол Улсын хувьд газар зүйн байршил алслагдсан тул ТАБНЭЗХА-ны хүрээнд говийн уудам газарт нарны эрчим хүчний томоохон байгууламж барьж Азийн “Супер сүлжээ” үүсгэх зорилт тавьж байна. Гэвч бидэнд байдаг мэргэжлийн боловсон хүчний мэдлэгийг дээшлүүлэх, хуучирсан тоног төхөөрөмжийг шинэчлэх хөрөнгө оруулалтын дутагдал гарах, горим тохируулга туршилтын хамтын ажиллагааны харилцаа үүсгэх, бүс нутгийн хүрээнд техник эдийн засгийн үндэслэл, зураг төсөл боловсруулах институт байгууллага байгуулах зэрэг шийдвэрлэх асуудлуудаар хамтын ажиллагааг өргөжүүлэн идэвхтэй байр сууринаас ажиллах шаардлагатай байна.