Олон улсын Хүүхдийн эрхийг хамгаалах өдөр буюу Эх үрсийн баярын өдрийг тохиолдуулан ХАХНХ-ын сайд С.Эрдэнэ өнөөдөр Эрүүл мэндийн яамны харьяа, “Нялхасын Клиник Сувилал”-д зочиллоо. Өнчин, хагас өнчин, амьдралын баталгаажих доод түвшинд байгаа хүмүүсийн суурь өвчтэй, бага жинтэй, хаягдсан зэрэг онцгой анхаарал шаардлагатай хүүхдүүд тус сувилалд харьяалагддаг.
Тэгвэл эдгээр хүүхдүүдийн нөхцөл байдал болон сувилалын үйл ажиллагаатай ХАХНХ-ын сайд танилцаж, баярын мэнд дэвшүүлэн, гарын бэлгээ өгсөн юм. Мөн улс эх орны ирээдүй болсон хүүхэд багачуудыг өсгөн, хүмүүжүүлэх, тэдэнд төрүүлсэн эцэг эх шиг нь хандаж, хайр халамжаар дутаахгүй өсгөж буй эмч, ажиллагсадын төлөөллийг Засгийн газрын шагнал болох салбарын тэргүүний ажилтан цол тэмдэг, ХАХНХЯ-ны хүндэт жуух бичигээр шагнаж урамшуулсан.
Түүнчлэн ХАХНХ-ын сайд С.Эрдэнэ “Эх хүүхдийн эрүүл мэндийн нэгдсэн төв”-ийн хүүхдийн тасагт эмчлүүлж байгаа хүүхдүүд болон баярын энэ өдөр шинээр мэндэлсэн хүүхдүүд, эцэг эх, эмч, сувилагч нарын төлөөлөлтэй уулзаж, баярын мэнд дэвшүүлээ.
Тус төвийн төрөх тасагт өглөөний 09:00 цагийн байдлаар 10 охин, 8 хүү Монгол эх орныхоо иргэн болсон байна. Энэхүү баярт мөчийг хуваалцах үеэр Эх хүүхдийн эрүүл мэндийн эмч ажиллагсадын төлөөлөлд ч мөн Засгийн газрын шагнал болох салбарын Тэргүүний ажилтан цол тэмдэг, ХАХНХЯ-ны хүндэт жуух бичиг гардуулан өгч, Монгол Улс эх орныхоо хүн ам, үр хүүхдийг өсгөх, хариуцлагатай ажил, үүргээ амжилттай биелүүлэхийг хүсэн ерөөлөө.
