Баянхонгор аймаг нь Монгол улсын баруун өмнөд хэсэгт 116 мянган хавтгай дөрвөлжин км талбай эзлэн Хангайн нурууны өмнө талын тэгш өндөрлөг, Говь-Алтайн нурууны зүүн өмнөд хэсгийн салбар уулс, Их нууруудын хотгорын дундад бие, Алтайн цаад говийн нилээд хэсгийг хамардаг.
Нутгийн умраас өмнө зүг 300 км, дорноос өрнө тийш 580 км, хилийн урт нь 1830 км, үүний 1700 км газраар Өвөрхангай, Өмнөговь, Говь-Алтай, Завхан, Архангай аймгуудтай нутаг залгаж, 130 км-ээр БНХАУ-тай хиллэдэг.
Баянхонгор аймаг нь Төв Азийн өндөрлөгт Сибирийн их тайгаас Төв Азийн говь цөлд шилжих шилжилтийн ландшафт бүхий байгалийн олон янзын бүс бүслүүрийг хамран оршиж байгаа нь аялал жуулчлалын олон төрөл хэлбэрийг хөгжүүлэх давуу талыг бий болгосон.
Нутгийн ихэнх нь далайн түвшнээс дээш 1000-1400 метр өргөгдсөн, хамгийн өндөр нь Их Богд уул 3957 м, хамгийн нам дор газар нь Эхийн гол 750 м болно.
Баянхонгор аймаг нь өвөлдөө -40 хэм хүртэл хүйтэрч, зундаа +30 хэм хүртэл халдаг эх газрын эрс тэс уур амьсгалтай.
Хэдийгээр хүйтэн сэрүүн уур амьсгалтай ч цэлмэг өдрийн тоо олон, нарны гийгүүлэлтийн хугацаа урт байдаг нь бүрхэг тэнгэртэй Европын хувьд бишрэл төрүүлэх төдийгүй одон орон сонирхогчдыг татах гол /соронзон/ бүтээгдэхүүн.
Тухайлбал: энэ дэлхий дээрх хамгийн эртний хүмүүс амьдарч байсныг нотолсон Цагаан агуй, өөр гариг ертөнцийн оюун ухаантнуудын бүтээл байж болох юм гэж зарим судлаачид тодорхойлдог Цагаан булагийн хадны дүрс зургууд, эртний хүмүүсийн хаданд бичиж үлдээсэн бичиг соёлын нандин өв болох Бичигтийн хөндийн хадны сүг зургууд бүхий байгалийн галарей, байгалийн өвөрмөц сонин тогтоцтой, анагаах эдгээх чадвараараа хосгүй 96 хэмийн халуун Шаргалжуутын халуун рашаан, одоогоос 100-200 сая жилийн тэртээ амьдарч байсан аварга биет диназаворын чулуужсан яс бүхий Бүгийн цав, энэ дэлхий дээр анх Монгол нутагт шатар үүссэнийг гэрчлэх Шатар чулууны хөшөө дурсгал, дэлхий дээр зөвхөн Баянхонгорын нутагт цөөн тооны байдаг говийн баавгай хэмээх “Мазаалай” гэх мэт гайхамшгуудыг нэрлэж болох юм.
