Бүгд Найрамдах Хятад Ард Улсын Стандартчиллын агентлаг, Хятадын худалдаа, аж үйлдвэрийн танхим хамтран Бээжин хотноо 2016 оны 12 дугаар сарын 9-ний өдөр Олон улсын стандартчиллын байгууллагын Мах, шувуу, загас, өндөг, тэдгээрийн бүтээгдэхүүний стандартчиллын дэд хороо (ТХ34/ДХ6)-ны 22 дугаар хурлыг зохион байгууллаа.
Энэхүү хуралд Стандарт, хэмжил зүйн газрын Бүтээгдэхүүн, тогтолцооны баталгаажуулалтын газрын ахлах мэргэжилтэн Л.Золзаяа, Стандартчилал, тохирлын үнэлгээний бодлогын газрын мэргэжилтэн Д.Даваасүрэн нар оролцлоо.
Энэхүү хуралд Олон улсын стандартчиллын байгууллагын нарийн бичгийн дарга нарын газрын төлөөлөл болон Мах, шувуу, загас, өндөг, тэдгээрийн бүтээгдэхүүний стандартчиллын дэд хороо (ТХ34/ДХ6)-ны жинхэнэ гишүүдээс Швед, Орос, Нигер, Мозамбик, Монгол, Хятад улсын төлөөлөгчид оролцов.
Тус хурлаар Мах, шувуу, загас, өндөг, тэдгээрийн гаралтай бүтээгдэхүүнтэй холбоотой стандартуудад хийсэн үзлэгийн дүн, шинээр болон шинэчлэн боловсруулах дор дурдсан 3 нэрийн стандартын шинэ санааг авч хэлэлцсэн. Үүнд:
1.ISO 4134:1999, Мах, махан бүтээгдэхүүн. L-(+) глютамины хүчлийн агууламжийг тодорхойлох магадлах арга /дахин хянаж шинэчлэх/
2.Өндөг /шинээр боловсруулах/
3.Ферментжүүлсэн махан бүтээгдэхүүн /шинээр боловсруулах/
Шинэчлэн боловсруулах “ISO 4134:1999, Мах, махан бүтээгдэхүүн - L-(+) глютамины хүчлийн агууламжийг тодорхойлох магадлах арга” стандартын төсөл боловсруулах ажлын хэсэгт Монгол улс хамтран ажиллах гишүүнээр томилогдлоо.