Бээжин дэх Бельгийн Вант Улсын Элчин сайдын яамны Элчин зөвлөх Рик Вон Дрүгенбрөк тэргүүтэй төлөөлөгчдийг Эрүүл мэндийн яамны Төрийн нарийн бичгийн дарга Ж.Хатанбаатар хүлээн авч уулзлаа.
Уулзалтын эхэнд Элчин зөвлөх Рик Вон Дрүгенбрөк өөрийн улсын бизнесийн төлөөллийг цаг гарган хүлээн авч уулзаж байгаад Төрийн нарийн бичгийн дарга Ж.Хатанбаатарт талархал илэрхийлээд хоёр улсын Засгийн газар хоорондын хэлэлцээрийн дагуу тодорхой төслүүд амжилттай хэрэгжсэнд сэтгэл хангалуун байгаагаа илэрхийлэв.
Төрийн нарийн бичгийн дарга хариу талархал илэрхийлж, “Зүүн бүсийн оношилгоо, эмчилгээний төвийг сайжруулах төсөл”-ийг амжилттай хэрэгжүүлэхэд Бельгийн Вант улсын дэмжлэг, оролцоо, төслийн гүйцэтгэгч компаний үүрэг оролцоо чухал байсныг дурьдаад энэ нь Монгол, Бельги хоёр улсын хоорондын хамтын ажиллагааг улам бүр хөгжүүлэхэд тодорхой түлхэц болсныг онцлон тэмдэглэв. Түүнчлэн тус төслийн үргэлжлэл хэмээн үзэж болох Ховд аймаг дахь Баруун бүсийн оношилгоо, эмчилгээний төвийг сайжруулах төслийг мөн адил амжилттай хэрэгжүүлэхийг Эрүүл мэндийн яамны зүгээс дэмжиж байгаагаа илэрхийллээ.
Элчин зөвлөх Рик Вон Дрүгенбрөк Баруун бүсийн оношилгоо, эмчилгээний төвийг сайжруулах төслийн зээлийн хэлэлцээрийн төслийг Бельгийн талаас ойрын хугацаанд Монгол улсын Эдийн засгийн хөгжлийн яам болон Эрүүл мэндийн яаманд ирүүлэх тал дээр анхаарч ажиллаж байгааг хэлээд, тус төслийг Бельгийн талаас хамтран хэрэгжүүлэх FSE компанийн төлөөлөлтэй төслийн техникийн ажлын хэсэгт ЭМЯ-ны зүгээс ойр хамтран ажиллахыг хүсч байлаа.
Уулзалтын төгсгөлд төлөөлөгчид хамтын ажиллагаагаа хөгжүүлэх, хэлэлцэгдэж байгаа төслүүдээ амжилттай хэрэгжүүлэхэд хоёр талаасаа идэвхтэй хамтран ажиллахаа илэрхийлсэн юм.