Дэлхийн өрхийн эмч нарын өдрийг угтан өрхийн эрүүл мэндийн төвийн эмч, мэргэжилтнүүд иргэдэд чиглэсэн бүтээлч ажлыг зохион байгуулах, өрхийн эрүүл мэндийн төвийн үйл ажиллагааг сурталчилах зорилгоор “Эрүүл мэнд-Эрхэм баян” сэдэвт мянган эмч, иргэнийг оролцуулсан явган аялалыг Монголын өрхийн анагаах ухааны мэргэжилтнүүдийн холбоо, Эрүүл мэндийн яам, Сүхбаатар дүүргийн өрхийн эрүүл мэндийн төвүүдтэй хамтран өнгөрсөн амралтын өдрүүдэд зохион байгууллаа.
Явган аялалын нээлтийн арга хэмжээ Бурхан Будда хөшөөний талбайд болсон бөгөөд нээлтэд Эрүүл мэндийн дэд сайд Ж.Амарсанаа оролцож хэлэхдээ “Дэлхийн өрхийн эмч нарын өдөр 5 дугаар сарын 19-нд болдог. Энэ өдрийг Монгол улсад хоёрдахь удаагаа тэмдэглэн өнгөрүүлж байна. Энэ жил энэ өдрийг угтан Монголын өрхийн анагаах ухааны мэргэжилтнүүдийн холбоо, Эрүүл мэндийн яамнаас 250 гаруй өрхийн эмч нарыг оролцуулан ажил мэргэжлийн ур чадварын тэмцээн, 300-аад сувилагчийг оролцуулсан ажил мэргэжлийн ур чадварын тэмцээнүүдийг тус тус зохион байгуулаад байна. 1000 эмч, иргэдийг оролцуулан зохион байгуулж буй явган аялалын арга хэмжээ нь ч энэ ажлын нэг хэсэг юм. Дэлхийн өрхийн эмч нарын өдрийг ийнхүү Монголд тэмдэглэдэг болсон нь баяр гэхээсээ илүүтэй, өрхийн эрүүл мэндийн төвүүдийн үйл ажиллагааг сурталчилсан, ажлын үр дүнгээ тайлагнасан, тусламж үйлчилгээний чанарыг дээдэлсэн, олон нийтэд үйл ажиллагаагаа сурталчилан таниулах чухал өдөр болгон тэмдэглэдгээрээ онцлог юм” хэмээв.
Аялалын хөтөлбөрт иргэдийг хөдөлгөөний хомсдлоос сэргийлэх, эрүүл чийрэг амьдрахад хөдөлгөөн чухал гэдгийг уриалах, хөдөлгөөн эрүүл мэндийн талаар сургалт, сурталчилгаа хийх, өрхийн эмч, мэргэжилтнүүд иргэдийн хамгийн дотны туслагч гэдгийг ойлгуулах зорилгоор асуулт хариултын АХА, олс таталт, сумо зэрэг тэмцээнүүдийг зохион байгуулав.
Тэмцээнд нийслэлийн 6 дүүргийн өрхийн эрүүл мэндийн төвийн эмч, эмнэлгийн мэргэжилтнүүд, иргэдийн хамтарсан баг болон оролцсон бөгөөд СХД-ийн баг тэргүүлж 500000 төгрөг, Сүхбаатар дүүрэг удаалж 300000 төгрөг, гуравдугаар байрт Чингэлтэй дүүргийн баг шалгаран 200000 төгрөгийн шагнал, өргөмжлөлөөр шагнуулав.
Оролцогчид таних тэмдэг, хувцаслалтаар жигдэрч, эрүүл амьдралыг уриалсан уриа барьж, өндөр зохион байгуулалттай, өрсөлдөөнтэйгөөр тэмцээнд оролцсон юм.
Багууд Дэлхийн өрхийн эмч нарын өдрийг бэлгэдсэн шар уриаг барьж, иргэддээ зөв хооллолт, хөдөлгөөн эрүүл мэнд, идэвхтэй амьдралын талаар таниулан, сургалт сурталчилгааг аялалын явцад дор бүрнээ хийж явсан нь иргэдэд чиглэсэн томоохон сурталчилгаа болсон юм.