Сургууль, цэцэрлэгийн хүртээмж халуун сэдэв болоод байгаа энэ үед хаа сайгүй энэ сэдвийг хөндөж, гарц хайх болсон.
Дархан-Уул
аймгийн хувьд өнгөрсөн жилүүдэд сургуулийн өмнөх боловсролын
хүртээмжийг нэмэгдүүлэхэд багагүй анхаарч, нэн ялангуяа гэр хорооллын
алслагдсан багийн хүүхэд багачуудыг цэцэрлэгт хамруулах зорилгоор хэд хэдэн цэцэрлэгийн барилгыг ашиглалтанд оруулсан нь нүдээ олсон хөрөнгө оруулалт болж чадсан юм.
2016
оны эхний 9 сарын байдлаар аймгийн хэмжээнд 44 цэцэрлэгт 7900 хүүхэд
сургуулийн өмнөх боловсролд хамрагдаж, хамран сургалт 96 хувьд хүрсэн
байна. 2012 оны суурь үзүүлэлттэй харьцуулахад цэцэрлэгийн тоо 23-аар
нэмэгдэж, цэцэрлэгт хамрагдаж буй хүүхдийн тоо 1,5 дахин өсөж, хамран
сургалт 20 гаруй хувиар нэмэгдэж, шинээр 250 гаруй ажлын байр бий
болжээ. 2016 онд Шарын гол суманд 1, Дархан суманд 1 цэцэрлэгийн барилга
тус тус ашиглалтанд орж, сургалтын үйл ажиллагаа эхэлсэн байна.
Өнгөрсөн жил үйл ажиллагаагаа эхлүүлсэн шинэ цэцэрлэгүүд өнөө жил хоёр
дахь хичээлийн жилийн элсэлтээ авч, нэг жилийн хугацаанд амжуулсан ажил,
гаргасан амжилтаа танилцуулж байна.
ДАРХАН СУМЫН НАЙМДУГААР ЦЭЦЭРЛЭГ
Дархан сумын 1 дүгээр
баг, Бандийн толгойд 8 дугаар цэцэрлэгийн барилгыг барьж, ашиглалтад
оруулснаар 200 гаруй хүүхэд цоо шинэхэн цэцэрлэгт сурч, тоглох боломжтой
болж, аав ээжүүд нь сэтгэл амар ажлаа хийж боломж бүрдсэн. Энэ бол та
бидний хүлээж байсан үр дүн.
Тус цэцэрлэгийн 28 багш, ажиллагсад
СӨБ-ын бодлого, хөтөлбөрийг хэрэгжүүлэн хүүхэд нэг бүрийг хөгжлийн одоо
байгаа түвшингээс ахисан түвшинд хүргэж хөгжүүлэх сургалтын аргазүй
технологийг сайжруулан хүүхдийн хөгжлийг дэмжсэн орчин бүрдүүлэхийн
төлөө ажиллаж байна. Тэд cургуулийн өмнөх боловсрол олгох сургалтын
“Цөм” хөтөлбөр, “Зөв Монгол хүүхэд” үндэсний хөтөлбөрийн дэд хөтөлбөр
“Ном”, “Авьяас”, “Багшийн хөгжил” зэрэг хүүхдэд ээлтэй, тэдний сурч
хүмүүжиж, өсч хөгжих боломжийг бүрдүүлсэн олон хөтөлбөрүүдийг амжилттай
хэрэгжүүлж байна.
Нэг жилийн ойн баяраа тэмдэглэж буй Дархан сумын наймдугаар цэцэрлэгийн эрхлэгч Г.Энхтулгатай цөөн хором ярилцлаа.
-Үйл
ажиллагаа явуулж эхлээд бүтэн нэг жил болжээ. Та бүхэнд баяр хүргэе.
Энэ хичээлийн жилд ямар зорилго зорилт дэвшүүлэн ажиллаж байна вэ?
-Юуны
өмнө цэцэрлэгийнхээ бяцхан багачууд, тэдний аав ээжүүд, багш,
ажилтнууд, Сургуулийн өмнөх боловсролын салбарын хөгжлийн төлөө ажил,
амьдралаа зориулан буй мэргэжил нэгт нөхөд, удирдлагууд, хамтран
ажиллагсад та бүхэнд цэцэрлэгийнхээ нэг жилийн ойн баярын мэнд хүргэж,
ажил үйлс тань цалгиж байхын өлзийтэй ерөөлийг өргөн дэвшүүлье.
Энэ
хичээлийн жилд багш нарынхаа заах арга, ур чадварыг дээшлүүлж, тэргүүний
арга барилыг түгээн дэлгэрүүлнэ. Хүүхдийн авьяас чадварыг хөгжүүлэх
гадаад сургалтын орчин буюу гадаад талбайг хөгжүүлэхэд анхаарна.
-Танай
цэцэрлэгт олон хөтөлбөрүүд хэрэгжиж байна. Шинэ цэцэрлэгийн хувьд
сургалтын хэрэглэгдэхүүн, материаллаг баазаа хэрхэн бэхжүүлж байна вэ?
-Бага
насны хүүхдийн хөгжлийг дэмжих цөм хөтөлбөрийг хэрэгжүүлэх сургалтын
хөтөлбөрийг хүүхдийн хэрэгцээ, насны онцлогт тохируулан
боловсруулсан.Багш нар маань сургалтынхаа үзүүлэн, тараах материал,
тоглоом наадгайг өөрсдийн боломжоор бэлтгэж байнга баяжуулдаг.
Хүүхдийн эрүүл өсөж хөгжих боломжийг хангах зорилгоор эрүүл мэндийн
хичээлийг сургалтын хөтөлбөртөө оруулсан. Мөн гал тогоог тохижуулж,
хүүхдийн хоол хүнсний хангамж, хадгалалт хамгаалалтыг сайжруулсан. Багш,
ажилтнууд маань багаар ажиллаж, гадаад талбайдаа цөөн тооны тоглоомыг
хийж байршуулсан гээд манай цэцэрлэгийнхэн бүгдийг төрөөс хийж өгнө гэж
харалгүйгээр өөрсдийн дотоод нөөц боломжоо дайчлан ажиллаж байна.
-Багш, хүүхдийн хөгжлийг дэмжсэн ажлуудаас нэрлээч?
-Багш,
туслах багшийн мэргэжлийн ур чадварыг дээшлүүлэхэд чиглэсэн “Чадварлаг
багш” ур чадварын уралдаан, “Бид хамтдаа” зэрэг сургалт зөвлөгөө өгөх
ажлыг байнга зохион байгуулж байна. Хүүхдийн хөгжлийг дэмжсэн “Бидний
төрсөн өдрийн баяр”, “Сарын онцлог нэг өдөр”, “Хөл бөмбөгийн тэмцээн”,
”Монгол гоёл”, “Бүжгийн баяр”, “Цэцгийн баяр”, “Талархлын өдөр”, “Гэр
бүлийн өдөр”, “Номын аян” зэрэг олон сонирхолтой ажлуудыг төлөвлөж
явуулдаг. Багш нар, хүүхдүүд маань маш их идэвхитэй оролцдог.
-Цэцэрлэгүүд багш, эцэг эх, хүүхэд гэсэн гурвалсан харилцааг чухалчилдаг. Танай цэцэрлэгийн хувьд?
-Эцэг
эхийн хамтын харилцаагаа эцэг эх, багшийн хоорондын байгуулсан
гэрээгээр зохицуулж сургалтын орчин бүрдүүлэх, цэцэрлэгийн зөвлөл болон
эцэг эхийн зөвлөлийн ажилтнуудтай хамтран цэцэрлэгийн хэтийн
төлөвлөлтийг боловсруулан ажиллаж байна.
Ийнхүү Дархан сумын 8 дугаар
цэцэрлэгийн хамт олон хүүхдийн хүсэл тэмүүлэл суурь хэрэгцээг чухалчилж
баяр баясгалан, эрч хүч, эв нэгдэлтэй, мэргэжлийн өндөр ур чадвартай
хамт олон болох эрмүүн хүсэлд хөтлөгдөн ажиллаж байна.
Ярилцсан: Х.СОЁЛ-ЭРДЭНЭ