Эрүүл мэндийн яам, Монголын сумын эмч, мэргэжилтний холбоо хамтран “Сумын эрүүл мэндийн төвийн хөгжлийн шинэчлэл” улсын зөвлөгөөнийг 5 дугаар сарын 23-24-ний өдрүүдэд Сүнжин гранд зочид буудлын хурлын танхимд зохион байгууллаа.
Уг зөвлөгөөний нээлтэд МУ-ын Ерөнхий сайд Н.Алтанхуяг, Эрүүл мэндийн сайд Н.Удвал, Нийгмийн бодлого, боловсрол, соёл, шинжлэх ухааны байнгын хорооны дарга, УИХ-ын гишүүн З.Баянсэлэнгэ, ДЭМБ-ын Суурин төлөөлөгч Др.Су Нюнт-У нар оролцож үг хэлэв.
Ерөнхий сайд Н.Алтанхуяг зөвлөгөөнд оролцогчдод Шинэчлэлийн Засгийн газраас эрүүл мэндийн салбарт баримталж буй бодлого чиглэл, эхлүүлсэн ажлаас танилцууллаа. Тэрбээр бугшмал олон асуудалтай энэ салбарын шат бүрт шинэчлэл хийх хэрэгтэй ч төсөв хөрөнгийн хүрэлцээнээс хамааран ээлж дараатай хийнэ. Төсвийн хөрөнгөөр хийх ажлуудаас гадна Ерөнхий сайдын багцын 50 тэрбум төгрөгийн 30 тэрбумыг эрүүл мэндийн салбарт зарцуулахаар хуваарилсан, түүнчлэн аймгийн төвүүдэд битүү зах барихад 10 тэрбумыг төсөвлөсөн нь ард иргэдийн эрүүл мэндийг хамгаалахад оруулж буй шууд бус хөрөнгө оруулалт гэдгийг хэллээ.
Эрүүл мэндийн сайд Н.Удвал уулзалтыг нээж хэлсэн үгэндээ иргэдэд эмнэлгийн тусламж үйлчилгээ үзүүлэх хамгийн чухал нэгж бол Сумын эрүүл мэндийн төв гэдгийг онцлон хэлэв. Тэрбээр эрүүл мэндийн салбарын маш олон бодлогын баримт бичгүүд хэрэглэгчдэд үр дүнгээ өгч байгаагийн нэг нь бол Сумын эрүүл мэндийн төвийн стратегийг хөгжүүлэх асуудал. Бид өрхийн ЭМТ-ийг хөгжүүлэх, үйл ажиллагааны чиглэл стратегийг Өрхийн эмч нарын чуулга уулзалтаар хэлэлцэж баталсан, энэхүү уулзалтаар ч мөн адил Сумын эрүүл мэндийн төвийн тусламж, үйлчилгээний өнөөгийн байдал, хүртээмж, чанар, тулгамдсан асуудал, цаашид авах арга хэмжээний талаар санал солилцон зөвлөмж гаргаж, хөгжлийн шинэчлэлийн стратеги, бодлогыг хэлэлцэх болно гэв.
Эхний өдрийн зөвлөгөөнийг ЭМЯ-ны Төрийн нарийн бичгийн дарга Ж.Хатанбаатар, Эрүүл мэндийн сайдын зөвлөх Л. Жамбалжав нар удирдан явуулсан бөгөөд “Анхан шатны тусламж, үйлчилгээний дэлхий нийтийн чиг хандлага” сэдвээр Азийн хөгжлийн банкны “ЭМСХХ-3” төслийн удирдагч Б.Булганчимэг, “Сум, тосгоны эрүүл мэндийн төвийн өнөөгийн байдал, тулгамдсан асуудал” сэдвээр ЭМЯ-ны Эмнэлгийн тусламжийн хэлтсийн дарга Я.Амаржаргал нар илтгэл тавилаа.
Үүний дараа ЭМЯ-ны Төрийн нарийн бичгийн дарга Ж.Хатанбаатар зарим сумдын Эрүүл мэндийн төвийн тэргүүний эмч мэргэжилтнүүдэд шагнал гардуулсан юм. Үдээс хойшхи зөвлөгөөнөөр ЭМШУИС-ийн дэд захирал Д.Амарсайхан “Ерөнхий мэргэжлийн эмч бэлтгэх, сургалтын өнөөгийн байдал, цаашдын хандлага” сэдвээр, Монголын сумын эмч мэргэжилтний холбооны тэргүүн Ц.Ганхүү “Сумын эрүүл мэндийн төвийн хөгжилд төрийн бус байгууллагын үүрэг оролцоо” сэдвээр, Сүхбаатар аймгийн ЗДТГ–ын Нийгмийн хөгжлийн хэлтсийн мэргэжилтэн М.Дэлхийцэцэг “Сумын эрүүл мэндийн төвийн үйл ажиллагааг бэхжүүлэхэд нутгийн захиргааны байгууллагын оролцоог сайжруулах нь” сэдвээр тус тус илтгэл тавьж хэлэлцүүлэв.
Тус зөвлөгөөнд 21 аймгийн 330 сум, тосгоны Эрүүл мэндийн төв, Сум дундын эмнэлгийн эмч мэргэжилтнүүд болон холбогдох байгууллагуудын төлөөлөл болох 400 орчим хүн оролцлоо.
Зөвлөгөөнөөр Сумын эрүүл мэндийн төвийн өнөөгийн байдал, тулгамдсан асуудлуудыг шийдвэрлэх арга зам, хөгжлийн шинэчлэлийн стратегийг тодорхойлох бөгөөд сумын эмнэлгийн бүтэц үйл ажиллагааны стандартыг хэлэлцэнэ. Түүнчлэн Сумын эмнэлгийн тусламж, үйлчилгээний багцыг тодорхойлж, Сумын эрүүл мэндийн төвийн үйл ажиллагааг бэхжүүлэхэд нутгийн захиргааны байгууллагын оролцоог сайжруулахад чиглэгдэж байгаа аж.
