Монгол Улсын Ерөнхий сайд Ж.Эрдэнэбат Бүгд Найрамдах Социалист Вьетнам Улсын Ерөнхий сайд Нгуен Суан Фук нар Төрийн ордонд албан ёсны хэлэлцээ хийлээ. Хэлэлцээ харилцан ойлголцсон, найрсаг уур амьсгалд амжилттай боллоо гэж хоёр орны Ерөнхий сайд онцоллоо.
Вьетнамын Коммунист Намын 12 дугаар Их хурал, Үндэсний Ассамблейн чуулган амжилттай хуралдаж, ирэх 5 жилийн зорилт, чиглэлээ амжилттай баталж, хурлын дүнд Вьетнам Улсын Ерөнхий сайдаар томилогдсон Нгуен Суан Фукт Ерөнхий сайд Ж.Эрдэнэбат баяр хүргээд анхны гадаад хүндэт зочин болж, манай улсад айлчилж байгаад баяртай байна гэж хэлэлцээний эхэнд тэмдэглэлээ. Мөн тэрээр хоёр улсын хооронд харилцаа, хамтын ажиллагааг өргөжүүлэх чиглэлээр хоёр талаас идэвхи, хүчин чармайлт гаргаж ирсэнд монголын тал сэтгэл хангалуун байгаагаа илэрхийлж, хоёр улс бүс нутаг, олон улсын тавцанд үр дүнтэй хамтран ажиллаж ирснийг онцлов.
Бүгд Найрамдах Социалист Вьетнам Улсын Ерөнхий сайд Нгуен Суан Фук АСЕМ-ын дээд түвшний 11 дүгээр уулзалтыг Монгол Улсад зохион байгуулж байгаад баяр хүргэе гээд Монгол Улс даргалж байгаа энэ уулзалт амжилттай болж, олон улсын тавцанд Монгол Улсын эзлэх байр суурь, нэр хүнд дээшилнэ гэж итгэж байна гэлээ. Мөн Ерөнхий сайд Ж.Эрдэнэбатыг Бүгд Найрамдах Социалист Вьетнам Улсад албан ёсны айлчлал хийхийг урилаа.
Тус улсын талаас батлан хамгаалах салбарын хамтын ажиллагааны санамж бичгийг үр бүтээлтэй хэрэгжүүлэх, хоёр орны Засгийн газар хоорондын комиссын үйл ажиллагааг идэвхижүүлэх, цагаан будаа, хүнсний ногоо, кофе, элсэн чихэр зэрэг бүтээгдэхүүнийг нийлүүлэх хүсэлтэй байгаагаа илэрхийлснээс гадна хорио цээрийн стандартыг харилцан тохирч, Монгол Улсаас Вьетнам Улсад гүн хөлдөөсөн мах, махан бүтээгдэхүүн нийлүүлэх ажлыг урагшлуулахаа илэрхийллээ. Түүнчлэн Монголын талтай ашигт малтмалын чиглэлээр хамтран ажиллаж, бизнес, соёл, боловсрол, спортын хамтын ажиллагааг өргөжүүлэх чиглэлээр хамтран ажиллаж “Богд хааны ордон музей”, “Чойжин ламын сүм”-ийг засварлахад туслах боломжтой гэдгээ мэдэгдсэн юм.
Монгол Улсын Ерөнхий сайд Ж.Эрдэнэбат 2017 онд Вьетнам Улс АПЕК-ын дээд хэмжээний уулзалтыг зохион байгуулах гэж буйд баяр хүргээд, тус уулзалтад Монгол Улс зочноор оролцох хүсэлтэй байгааг илэрхийлсэн. Хүнс, хөдөө аж ахуй, боловсрол, соёл, эрүүл мэнд, аялал жуулчлалын салбарт хоёр орны хамтын ажиллагаа тодорхой хэмжээнд явагдаж байгаа боловч цаашид эдийн засгийн агуулгаар харилцаа, хамтын ажиллагаагаа өргөжүүлэн баяжуулах шаардлагатай байна гэлээ.
Мөн тэрээр хоёр орны уул уурхайн салбарын хамтын ажиллагаа тэр дундаа нүүрс, газрын тосны чиглэлээр хамтран ажиллах бололцоотой. Эдийн засгийн хамтын ажиллагааны хүрээнд арьс шир боловсруулах хамтарсан хөрөнгө оруулалттай үйлдвэр байгуулах Вьетнамын Аж үйлдвэрийн яамны саналыг дэмжиж байгаагаа онцлов. Засгийн газар хоорондын комиссын 15 дугаар хуралдааны шийдвэрийн дагуу Монгол Улсаас Вьетнам Улсад гүн хөлдөөсөн мах, махан бүтээгдэхүүн нийлүүлэх ажлыг урагшлуулахад хоёр талын Хөдөө аж ахуйн яам онцгойлон анхаарч, Вьетнамын Ерөнхий сайдын зүгээс биечлэн анхаарал хандуулж өгөхийг хүссэн юм.
Вьетнамын Засгийн газар Монголоос оюутан хүлээн авч сургаж байгаад Ерөнхий сайд Ж.Эрдэнэбат талархал илэрхийлээд цаашид мэргэжлийн сургалт, үйлдвэрийн чиглэлээр монголын багш нар, ажилчдыг дадлага, сургалтад хамруулахыг санал болголоо. Түүнчлэн түүх, соёлын дурсгалт зүйлсийг сэргээн засварлах салбарт хамтран ажиллахад санал нэгтэй байна гэв.
Монгол, Вьетнамын соёлын хамтын ажиллагааг өргөжүүлэх, энэ хүрээнд сэтгүүлч, хэвлэлийн ажилтан солилцох, хоёр улсын соёл, уран зохиол, түүхийн бүтээлүүдийг харилцан орчуулах, хэвлэх талаар хамтран ажиллах нь зүйтэй гэж үзэж байгаагаа Ерөнхий сайд илэрхийлэв.
Албан ёсны хэлэлцээнд Монголын талаас Гадаад хэргийн сайд Л.Пүрэвсүрэн, Монгол Улсаас Бүгд Найрамдах Социалист Вьетнам Улсад суугаа Элчин сайд Д.Энхбат, Монгол Улсын сайд, ЗГХЭГ-ын дарга С.Баярцогт, Хөдөө аж ахуйн сайд Р.Бурмаа, Уул уурхайн сайд Р.Жигжид, Ерөнхий сайдын Ахлах зөвлөх Б.Нямаа, Сангийн яамны Төрийн нарийн бичгийн дарга Х.Ганцогт болон албаны бусад хүмүүс байлцлаа гэж Засгийн газрын Хэвлэл мэдээлэл, олон нийттэй харилцах албанаас мэдээллээ.