Нийгмийн халамжийн тухай шинэчлэн баталсан хуульд заасан нийгмийн халамжийн дэмжлэг туслалцаа зайлшгүй шаардлагатай өрхийн гишүүн-иргэнд чиглэсэн хүнсний эрхийн бичиг олгох үйл ажиллагааг Хүн амын хөгжил, нийгмийн хамгааллын сайдын 2013 оны 03 сарын 01-ний өдрийн А/18 дугаар тушаалын дагуу тус газраас 21 аймаг, 9 дүүргийн Нийгмийн Халамж, Үйлчилгээний Хэлтсээр дамжуулан хэрэгжүүлж байна.
ХАХНХ-ын сайдын 2013 оны 03 сарын 01-ний өдрийн А/18 дугаар тушаалаар батлагдсан 231,026 бүхий босго онооноос доогуур буюу “Улсын хэмжээнд тооцсон амьжиргааны түвшингийн 5 хувийн шугамаас доогуурт багтсан хүн амын хамгийн бага хэрэглээтэй хэсэг болох” иргэдэд хүнсний эрхийн бичиг олголт хийгдэж байна.
Хүнсний эрхийн бичиг олгох үйл ажиллагаанд 2 үндсэн зохион байгуулалтыг ашиглаж байна. Өөрөөр хэлбэл, арилжааны банкны төлбөрийн систем бүрэн нэвтрээгүй хөдөөгийн 337суманд цаасан хэлбэрээр, нийслэлийн 9 дүүрэг болон 21 аймгийн төвд цахим хэлбэрээр олгож, сонгогдсон дэлгүүрүүдээс худалдан авалт хийж байна. Харин цахим хэлбэрийн хувьд сонгогдсон дэлгүүрүүдээс ПОС машин уншуулан худалдан авалт хийх зарчмаар ажиллаж байгаа юм.
Хүнсний эрхийн бичиг нь сар бүр 18-аас дээш насны иргэнд 10,000 төгрөг, 18 хүртэлх насны иргэнд 5000 төгрөгөөр тооцон олгоно.
Хүнсий эрхийн бичгээр худалдан авч болох бүтээгдэхүүний жагсаалт
1. Мах, дайвар бүтээгдэхүүн (импортын бус). Мах, дайвар бүтээгдэхүүнд худалдан борлуулахаар зөвшөөрөгдсөн бүх төрлийн мал, амьтны мах, малын гэдэс дотор, толгой, шийр орно. Хиам болон лаазалсан, дахин боловсруулсан махан бүтээгдэхүүн хамаарахгүй.
2. Сүү, сүүн бүтээгдэхүүн (импортын бус). Хуурай болон шингэн сүү, тараг, аарц хамаарна.
3. Гурил, гурилан бүтээгдэхүүн (импортын бус). Бялуу, кекс хамаарахгүй.
4. Цөцгийн тос
5. Элсэн чихэр
6. Төмс, хүнсний ногоо. Дарсан ногоо буюу лаазалсан, дахин боловсруулсан бүтээгдэхүүн хамаарахгүй.
7. Будаа. Бүх төрлийн будаа, хүүхдийн будаа, үр тариа, шар буурцгийн гаралтай бүтээгдэхүүн хамаарна.
8. Ургамлын тос
9. Өндөг
10. Жимс, жимсгэнэ. Компот, жимсний чанамал, хатаасан жимс хамаарахгүй.