2016.03.30
МХЕГ-ын улсын чанар стандартын хяналтын улсын ахлах байцаагч Б.Батчимэг Дорнод аймгийн мэргэжлийн хяналтын газрын байцаагч нартай хамтран хүнсний чиглэлээр үйл ажиллагаа эрхэлдэг аж ахуйн нэгжийн төлөөлөлд хоёр өдөр дараалан сургалт явууллаа.
Эхний өдрийн сургалтаар Дорнод аймагт нийтийн хоол, хүнсний үйлдвэрлэл эрхэлдэг 26 аж ахуйн нэгжийн удирдлага менежер, болон 67 хүнд “Хүнсний түүхий эд, бүтээгдэхүүнийг татан авах, устгах, дахин боловсруулах журам”, “Үйлдвэрлэлийн болон эрүүл ахуйн зохистой дадал нэвтрүүлэх зөвлөмж”, “Хүнсний түүхий эд, бүтээгдэхүүний ул мөрийг мөрдөн тогтоох бүртгэлийн журам” сэдвүүдээр мэдлэг олгож, хоол үйлдвэрлэлийг шалгах хяналтын хуудас, зохистой дадлын зөвлөмжөөр хангажээ.
Харин дараа нь Худалдааны томоохон сүлжээ төв, хүнсний дэлгүүр, мухлаг, тэдгээрт ажиллагсдад “Хүнсний худалдаанд эрүүл ахуйн зохистой дадлыг нэвтрүүлэх, дотоод хяналт тавих”, “Хүнсний түүхий эд, бүтээгдэхүүний ул мөрийг мөрдөн тогтоох бүртгэлийн журам”, “Хүнсний түүхий эд, бүтээгдэхүүнийг татан авах, устгах, дахин боловсруулах журам” сэдвүүдээр мэдлэг олгох сургалт мэдээлэл явуулав. Сургалтын явцад Худалдаалах үйл ажиллагааг шалгах хяналтын хуудсыг хэрхэн хөтлөх, эрсдэлийг хэрхэн үнэлэх талаар өөрсдөөр нь дүгнүүлэх дадлага сургууль хийж, заавар зөвлөмж өглөө. Энэхүү сургалтад 43 аж ахуйн нэгжийн 68 иргэн хамрагдсан аж. Сургалтад хамрагсдын хувьд цаг үеэ олсон хэрэгтэй мэдээлэл, мэдлэг олж авсандаа сэтгэл хангалуун байгаагаа илэрхийлж байлаа гэж МХЕГ-ын Гадаад харилцаа, олон нийттэй харилцах хэлтсээс мэдээлж байна.