Эрчим хүчний сургуулийн 55 жилийн ойн баярын хуралд Эрчим хүчний сайд Д.Зоригт оролцож үг хэллээ

Монгол Улсад эрчим хүчний салбарын инженер техникийн ажилтнуудыг бэлтгэж эхэлсэн буюу Эрчим хүчний сургууль үүсч байгуулагдсаны 55 жилийн ойг тохиолдуулан тус сургуулийн нийт хамт олон, үе үеийн багшнар эрдэмтэн доктор, профессор, эрчим хүчний инженер-техникийн ажилтнууд, ахмад настнууд, оюутнууд Та бүхэнд Монгол Улсын Засгийн газар, Эрчим хүчний яамны нэрийн өмнөөс болон хувиасаа чин сэтгэлийн халуун баяр хүргэж мэндчилье

Анх 1960 онд МУИС-ийн Байгалийн ухааны факультетийн дэргэд цахилгааны инженерийн ангийг нээснээр эрчим хүчний салбарын дээд боловсролтой үндэсний мэргэжилтэн бэлтгэн гаргах эх суурь тавигджээ.Өнгөрсөн хугацаанд мэргэжил эзэмшүүлдэг жирийн нэг ангиас их сургуулийн тэнхим, факультет болж, цаашилбал бүрэлдэхүүн сургууль болон үйл ажиллагаа нь өргөжин тэлсээр өнөөдөр ШУТИС-ийн томоохон сургуулийн нэг болж бакалавр, магистр, докторын зэрэг олгох сургалт явуулж, салбарын суурь судалгаа хийх мэдлэг, оюуны өндөр чадварыг төвлөрүүлсэн эрдэм шинжилгээний том төв болжээ.

Өнгөрсөн 55 жилийн хугацаанд тус сургуулийн эрдмийн ширээнээс 6000 гаруй залуучууд мэргэжил, боловсрол эзэмшиж, эрчим хүчний салбарын үе үеийн мэргэжилтэй боловсон хүчнийг бүрдүүлж ирсэн билээ. 1990-ээд оны эхэнд эдийн засгийн байдал хүндэрч, бүх салбарт хямрал нүүрлэсэн үед эрчим хүчний салбарын инженер техникийн ажилтнууд өөрийн эзэмшсэн мэргэжил, дадлага туршлага, сахилга зохион байгуулалтынхаа хүчээр улс эх орныхоо гал голомтыг тасралтгүй асааж авч гарсан түүхэн их гавьяа тус сургуультай зүй ёсоор холбогдох учиртай.

Өнөөдөр Эрчим хүчний сургуулийн бакалаврын сургалтад 2100,магистерт 200, докторантурт 10 гаруй, нийтдээ 2300 гаруй оюутан суралцаж байна. Ийнхүү эрчимтэй хөгжиж байгаа Монгол Улсын эрчим хүчний салбарт шилжин ирэх эрдэм боловсролтой шинэ залуу үе төлөвшин бэлтгэгдсэн байна.

Үе үеийн төгсөгчид болон өнөөдрийн оюутнуудын өмнө ажлын туршлага, мэдлэг чадварыг сорих шинэ шинэ бүтээн байгуулалт, цахилгаан станц, шугам сүлжээ,эрдэм шинжилгээ, туршилтын олон арван төсөл хөтөлбөр хүлээж байна.

    Өнөөдөр Эрчим хүчний сургууль нь эрчим хүчний инженерийн ухаан, боловсрол, төр, нийгмийн салбарт дотооддоо төдийгүй олон улсад танигдах нэр бүхий сургууль болон хөгжиж байна.ШУТИС-ийг 2021 онд олон улсад хүлээн зөвшөөрөгдсөн энтрепренер их сургууль болох зорилтын хүрээнд танай сургууль дэлхийн улс орнуудын мэрэгжилтэн бэлтгэдэг нийтлэг түвшинд ойртсон бакалавр, магистр, докторын зэрэг олгох шаталсан сургалт явуулах замаар эрчим хүчний салбарт шинэ техник,технологи нэвтрүүлэн материаллаг баазыг бэхжүүлэх, сургалтын технологийг боловсронгуй болгосноор сургалт – эрдэм шинжилгээ – үйлдвэрлэлийн нэгдлийг хангасан чанартай, хөрвөх чадвар бүхий инженерийн боловсон хүчийг бэлтгэх эрхэм зорилтыг дэвшүүлэн ажиллаж байгааг сайшаан тэмдэглэж байна.

Шинжлэх ухаан технологийн хөгжил эрчимжсэн өнөөгийн нөхцөлд нийгэм – эдийн засгийн хөгжлийн тулгуур болсон эрчим хүчний салбарт харилцан ашигтай хамтын ажиллагааг оюуны чадамжтайгаар хөгжүүлж улс орныхоо хөгжилтэй хөл нийлүүлэн ирээдүйгээ авч явах өндөр боловсролтой, өргөн мэдлэгтэй, чадварлаг мэргэжилтэн бэлтгэх эрхэм үүргээ нэр төртэй биелүүлэхийг хүсье.  

Та бүхэнд баярын мэндчилгээ дахин дэвшүүлж, ажлын амжилт, эрүүл энх сайн сайхан бүхнийг хүсэн ерөөе.

МЭНДЧИЛГЭЭ

Монгол Улсад эрчим хүчний салбарын инженер техникийн ажилтнуудыг бэлтгэж эхэлсэн буюу Эрчим хүчний сургууль үүсч байгуулагдсаны 55 жилийн ойг тохиолдуулан чин сэтгэлийн мэндчилгээ дэвшүүлье.

Анх 1960 онд МУИС-ийн Байгалийн ухааны факультетийн дэргэд цахилгааны инженерийн ангийг нээснээр эрчим хүчний салбарын дээд боловсролтой үндэсний мэргэжилтэн бэлтгэн гаргах эх суурь тавигджээ.Өнгөрсөн 55 жилийн хугацаанд тус сургуулийн эрдмийн ширээнээс 6000 гаруй залуучууд мэргэжил, боловсрол эзэмшиж, эрчим хүчний салбарын үе үеийн мэргэжилтэй боловсон хүчнийг бүрдүүлж иржээ.

 Өнөөдөр Эрчим хүчний сургуульд шат шатны түвшинд  нийтдээ 2300 гаруй оюутан суралцаж байна. Эд нар бол эрчимтэй хөгжиж байгаа Монгол Улсын эрчим хүчний салбарт шилжин ирэх эрдэм боловсролтой шинэ залуу үе юм.Үе үеийн төгсөгчдийнхөө халааг авах өнөөдрийн оюутнуудын өмнө шинэ шинэ бүтээн байгуулалт, цахилгаан станц, шугам сүлжээ,эрдэм шинжилгээ, туршилтын олон арван төсөл хөтөлбөр хүлээж байна.

Шинжлэх ухаан технологийн хөгжил эрчимжсэн өнөөгийн нөхцөлд нийгэм – эдийн засгийн хөгжлийн тулгуур болсон эрчим хүчний салбарт харилцан ашигтай хамтын ажиллагааг оюуны чадамжтайгаар хөгжүүлж улс орныхоо хөгжилтэй хөл нийлүүлэн ирээдүйгээ авч явах өндөр боловсролтой, өргөн мэдлэгтэй, чадварлаг мэргэжилтэн бэлтгэх эрхэм үүргээ нэр төртэй биелүүлэхийг хүсэн ерөөе.