2015.10.19
Мэргэжлийн хяналтын ерөнхий газрын Хөдөлмөр, нийгмийн хамгааллын хяналтын газраас орон даяар өрнүүлж байгаа “Хүний төлөө-Зөв тус” аяны хүрээнд Төв аймгийн Сэргэлэн сумын нутагт байрлах Хийт бетоны үйлдвэрт үзүүлэх сургалт зохион байгууллаа.
Уул уурхай болон барилга угсралтын чиглэлээр үйл ажиллагаа явуулдаг аж ахуйн нэгж, байгууллагуудын төлөөлөл сургалтад хамрагдан Хөдөлмөрийн аюулгүй байдал, эрүүл ахуй, Нийгмийн даатгал, Хөдөлмөрийн тухай хуулийн талаар мэдлэг, мэдээлэл, мэргэжил, арга зүйн зөвлөгөө авсан байна.
Тухайлбал Хөдөлмөрийн тухай хуулийн шинэчлэл ба хөдөлмөрийн харилцаа, ажлын байран дахь хөдөлмөрийн эрүүл ахуй, тавигдах шаардлага, үйлдвэрлэлийн осол, мэргэжлээс шалтгаалсан өвчний даатгал, ажилласан жилийг нөхөн тооцох зэрэг сэдвээр улсын байцаагч нар хичээл заалаа. Мөн нийгмийн хамгаалал, хөдөлмөрийн аюулгүй байдал, эрүүл ахуйн чиглэлээр аж ахуйн нэгжүүдэд тулгамдаж байгаа асуудлыг хэлэлцсэн байна.
Сургалтад оролцогсод “Монголын Алт” /МАК/ ХХК-ийн “Хийт бетон”-ы үйлдвэрт зочилж, Нийгмийн даатгал, Хөдөлмөрийн аюулгүй байдлын тухай хуулийг хэрэгжүүлж байгаа байдал болон сайн туршлагатай нь танилцжээ.
Үзүүлэх сургалтыг “Монголын Алт” ХХК болон Монголын Үйлдвэрчний Эвлэлийн Холбоотой хамтран зохион байгууллаа.
