Монгол Улсын Их Хурлын 2015 оны зургадугаар сарын 19-ны хуралдаанаар
“Төрөөс эрчим хүчний талаар баримтлах бодлогын баримт бичиг”-ийг батлан
гаргалаа.
Сүүлийн жилүүдийн эдийн засаг, нийгмийн хурдацтай өсөлт, зах зээлийн харилцааны эрчимжилт, хөрөнгө оруулалтын орчны эрх зүйн шинэчлэлт, эрчим хүчний салбарыг сонирхох гадаад, дотоодын хөрөнгө оруулагчдын идэвхжил зэрэг нь эрчим хүчний салбарын эрх зүйн орчин, бодлогын баримт бичгүүдийг боловсронгуй болгох шаардлага бий болсон юм.
“Эрчим хүчний нэгдсэн систем” хөтөлбөр, “Сэргээгдэх эрчим хүчний үндэсний хөтөлбөр” зэрэг бодлогын баримт бичгийн хэрэгжилтийг дүгнэхэд бага, дунд хэмжээний санхүүжилт шаардсан төсөл, арга хэмжээний биелэлт 90 гаруй хувь, их хэмжээний хөрөнгө оруулалт шаардсан төсөл, арга хэмжээний биелэлт 5 хүрэхгүй хувьтай байна.
Эдгээр хөгжлийн хөтөлбөрт тусгагдсан эх үүсвэрийн мега төслүүд, бүс нутгийг холбох дамжуулах шугамууд зэрэг том хэмжээний бүтээн байгуулалт, хөрөнгө оруулалт шаардсан төслүүд нь хөрөнгө, санхүүжилтийн нөхцөл байдлаас үүдэн цаг хугацаандаа хэрэгжиж чадаагүй, эрчим хүчний салбарыг зах зээлийн харилцааны дараагийн шатанд шилжүүлэх шаардлага бий болсон зэргээс үүдэн төрөөс эрчим хүчний талаар баримтлах бодлогыг тодорхой болгон батлах шаардлагатай болсон юм.
“Төрөөс эрчим хүчний талаар баримтлах бодлогын баримт бичиг” батлагдсанаар эрчим хүчний салбарын өнөөгийн нөхцөл байдал, тулгамдаж байгаа бэрхшээл, нөөц боломжийг дүгнэн, 3 тэргүүлэх чиглэлийн хүрээнд, 6 стратегийн зорилго, 26 зорилтыг тодорхойлж, тэдгээрийг 2015-2023 он, 2024-2030 он гэсэн 2 үе шаттайгаар хэрэгжүүлэх эрх зүйн үндэс бүрдэж байна.
Уг баримт бичгийн зорилго нь улс орны эрчим хүчний тогтвортой найдвартай хангамж, аюулгүй байдлыг хангах, үр ашиг, бүтээмжийг дээшлүүлэх, эрчим хүчний салбарын хүрээлэн буй орчинд үзүүлэх сөрөг нөлөөллийг бууруулах, ногоон хөгжлийг дэмжих хүрээнд ирээдүйд гарах шийдвэр, хэрэгжүүлэх арга хэмжээг чиглүүлсэн, эрчим хүчний бодлогын тэргүүлэх чиглэл, стратегийн зорилго, зорилтыг тодорхойлоход орших ба эрчим хүчний салбарын хөгжлийг төлөвлөх, анхдагч эрчим хүчний олборлолт, түлшний нөөц бүрдүүлэлт, цахилгаан дулааны үйлдвэрлэл, хангалтын үйл ажиллагаа, үр ашгийг дээшлүүлэх, эрчим хүчний салбарт төр, хувийн хэвшлийн хамтын ажиллагааг хөгжүүлэх, салбарыг чөлөөт зах зээлийн тогтолцоонд шилжүүлэх, эрх зүйн орчин, удирдлага, зохион байгуулалт, бүтцийг боловсронгуй болгох, боловсон хүчний чадавхыг бэхжүүлэх зэрэг арга хэмжээг төлөвлөхөд эрх зүйн гол үндэслэл болох юм.
Бодлогын баримт бичгийг боловсруулахдаа Монгол Улсын эрчим хүчний салбарын хөгжлийг эрх зүй, бүтэц, дэд бүтцийн бодлогын хамт цогцоор нь авч үзэж, Монгол Улсын Их Хурлаас баталсан “Ногоон хөгжлийн үзэл баримтлал”, “Ногоон хөгжлийн бодлого”-той уялдуулсан бөгөөд тогтоолын төсөл батлагдсанаар эрчим хүчний салбарт төрөөс баримтлах бодлого тодорхой болж, эрчим хүчний салбарт хөрөнгө оруулах гадаад, дотоодын хөрөнгө оруулагчдад эерэг нөлөө үзүүлнэ гэж Эрчим хүчний яам үзэж байна.