Гадаад хэргийн сайд Л.Пүрэвсүрэнгийн урилгаар манай улсад айлчилж буй НҮБ-ын Ерөнхий нарийн бичгийн даргын орлогч, Энхийг сахиулах ажиллагааны газрын дарга, ноён Эрве Ладсу тэргүүтэй төлөөлөгчдийг Ерөнхий сайд Ч.Сайханбилэг өнөөдөр хүлээн авч уулзлаа.
Ноён Эрве Ладсу хэлэхдээ “Олон улсын Энхийг сахиулах үйл ажиллагаанд Монгол улсын Зэвсэгт хүчин, цэрэг дайчдын оруулж буй хувь нэмрийг НҮБ-аас өндрөөр үнэлж байдаг. Зөвхөн цэрэг дайчид гэлтгүй Суданд ажиллуулж байгаа эмнэлгийн үйл ажиллагааг дэмжин тусалсан, цагдаагийн алба хаагчдаа НҮБ-ын Энхийг сахиулах үйл ажиллагаанд татан оролцуулж байгаа зэрэг бүх чиглэлээр дэмжин, хамтран ажиллаж байгаад талархаж байна. Цаашид энэхүү хамтын ажиллагаагаа үргэлжлүүлнэ гэдэгт итгэж байна” хэмээлээ.
Ерөнхий сайд Ч.Сайханбилэг ноён Эрве Ладсу тэргүүтэй төлөөлөгчдийг Монголд айлчилж буйд нь талархал илэрхийлээд Монгол улс цаашид ч Олон улсын Энхийг сахиулах үйл ажиллагаанд хувь нэмрээ оруулж, хамтран ажиллахад бэлэн байна. Энхийг сахиулахад эмэгтэйчүүдийн оролцоог дэмжсэнээр өнөөдөр Монголоос 73 эмэгтэй алба хаагч энэхүү үйл ажиллагаанд оролцож байна. Цаашид Энхийг сахиулах үйл ажиллагаанд оролцож буй цэрэг дайчдын эрүүл мэнд, аюулгүй байдалд хоёр талаас анхаарч, хамтын ажиллагаандаа тусгах нь чухал юм гэдгийг онцоллоо гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
