Монгол Улсын Ерөнхий сайд Н.Алтанхуяг, УИХ-ын гишүүн, Эдийн Засгийн хөгжлийн сайд Н.Батбаяр болон холбогдох албаны хүмүүс 2013 оны 12 дугаар сарын 3-4-ний өдрүүдэд Архангай аймагт томилолтоор ажиллаад ирлээ.
Томилолтын хүрээнд Архангай аймагт хийгдэж байгаа бүтээн байгуулалтын ажлуудтай танилцаж, иргэд төлөөлөгчидтэй уулзалт хийсэн юм. Тухайлбал төрийн үйлчилгээний ТҮЦ машины нээлт 21 аймагт нэгэн зэрэг болж, Архангай аймгийн нээлтэд оролцож, бусад аймгуудтай цахимаар шууд холбогдсон. Нээлтийн дараа Эрдэнэбулган суманд шинээр баригдсан “Хасу” битүү худалдааны төвийн үйл ажиллагаатай танилцав.
Мөн хүүхдийн номын сан болон “Ирээдүй” бага сургууль, цэцэрлэгийн цогцолборын сургалтын үйл ажиллагаатай танилцаж, сурагч багш нартай уулзалт хийлээ. “Шинэ хороолол”-ын бүтээн байгуулалтын ажлууд, 44 айлын орон сууцны цэвэр,бохир усны шугам сүлжээнд холбосон ажлууд, шугамын угсралтын ажлуудтай танилцаж, барилгын компанийн төлөөлөгчидтэй санал солилцов.
Архангай аймгийн ИТХ-ын дэргэдэх “Ахмадын зөвлөхүүд”-ийн төлөөлөгчидтэй уулзалт хийж, санал хүсэлтийг нь сонсож, ярилцсан. Ерөнхий сайд Н.Алтанхуяг ахмадын зөвлөл байгуулж, буурлуудынхаа сургаалыг сонсож, ажилдаа зөвлөмж авч байдгийг сайшаагаад 21 аймаг бүгд ахмадуудаа сонсвол зүйтэй гэж дэмжсэн юм. Үүний дараагаар иргэдтэй “Теле-уулзалт” зохион байгуулж, иргэдийн асуусан асуултуудад хариулж, Шинэчлэлийн Засгийн газрын ажлын талаар мэдээлэл өглөө.
УИХ-ын гишүүн Н.Батбаяр тойргийнхоо 19 сумдын засаг дарга нартай уулзалт хийж, өөрийн хийж буй ажил, сумдын хөрөнгө оруулалт, цаашид хийх ажлын талаар ярилцав.
Дараагийн өдөр Архангай аймгийн 100 залуучуудын “Өвлийн спортын арга хэмжээний нээлт”-д оролцож, Багшийн сургуулийн үйл ажиллагаатай танилцан, багш, оюутнуудтай уулзалт хийсэн юм. Түүнчлэн “Хогийн менежмент төсөл”-ийн ажилтай танилцаж, уг төсөл нь шинэлэг, боловсронгуй байгаагаараа онцлог байсан юм.
Эрдэнэбулган сумын бизнес эрхлэгчидтэй уулзалт хийж, тус сумын бизнесын салбарт тулгамдаж байгаа асуудлаар санал солилцож, хэрхэн шийдвэрлэх талаар ярилцав.